Pasintabi: Hindi ko po kilala ang may-ari ng bahay na ito (dalawang ginagawang bahay na magkatalikuran). Kami po ay may dinalaw lang na bahay sa parehong komunidad. (opo, bahay ang dinalaw namin sapagkat ang may-ari ay wala ngayon sa bansa at kami ang naatasang mangalaga sa bahay habang ang titira rito ay wala pa).

Kung tama ang aking pagkakaalala, ang pamagat ng aking napiling litrato sa linggong ito ay hango sa isang lumang kanta. Ang bahay ay simpleng istruktura lamang, isang proteksiyon sa lamig at mga masasamang elemento sa kapaligiran. Hindi mahalaga ang lakit nito, kung may apat o higit pang bilang ng sulok. Mas mahalaga na may apat na dingding na kumakalinga sa iyo o sa iyong pamilya (at nawa’y ang mga dingding ay hindi pa ang maging dahilan upang kayo’y magkalayo). Makahulugan lang ang iyong tinutuluyan kung may uuwian kang pangarap, tao o mga taong mahal mo sa buhay at alam mo sa sarili mo na talagang makapagpapahinga ka sa sarili mong mundo. Makahulugan lang ang iyong tinutuluyan kung sa lugar na ito ay maiibsan hindi lang ang pisikal na kapaguran kundi pati ang mga bumabagabag sa iyong puso’t damdamin.

*Bigla akong nakaramdam ng pangungulila.*

- - -

Pahabol. Naalala ko lang ang isang magandang kanta ni Chris Daughtry…

I’m going home,
Back to the place where I belong,
And where your love has always been enough for me.

- - -
LP #3: Apat na Kanto